கிடைத்தற்கரிய பொன்மொழிகள்  தமிழில் பரவிக்கிடக்கின்றன. அவற்றில்  சிலவற்றைப் பார்க்க விழைகிறீர்களா? இதைச் சொடுக்குங்கள்  (கோப்பைப்  பதிவிறக்கம் செய்தபின் படித்தால் தெளிவாய்க் காணலாம்)

எனது இற்றைநாள் கவிதைகளைப் படித்து மகிழ இதைச் சொடுக்கவும் :  (கோப்பை  பதிவிறக்கம் செய்தபின் படித்தால் தெளிவாய்க் காணலாம்) 

“The greatest textbook for leadership is facing crisis.” - Ratan Tata

“நெருக்கடிகளை எதிர்கொள்வதுதான் தலைமைக்கானப் பாடப்புத்தகம்” – ரட்டன் டாடா

அச்சம் உடையார்க்கு அரண் இல்லை   

 (குறள்: 534  -அதிகாரம்:  பொச்சாவாமை)

அகந்தூய்மை வாய்மையால் காணப்படும்                                                                            (குறள்: 298 – வாய்மை)

“குறள்தரும் குறுமொழி”

            தமிழில் முதல் அடியில் நான்கு சீர்களும், இரண்டாம் அடியில் மூன்று சீர்களும் கொண்ட குறள் வெண்பாதான் மிகச் சுருங்கிய வடிவில் அமைந்த பாடல் வகையாகும் (நூற்பா எனும் சூத்திர யாப்புக்கு அடுத்ததாக என்பர்). "அணுவைத் துளைத்தேழ் கடலைப் புகட்டிக் குறுகத் தறித்த குறள்” எனும் ஒளவை வாக்கிலிருந்து வள்ளுவரின் சொற்சிக்கனத்தையும், பொருட் செறிவையும் எளிதேயுணரலாம். இத்தன்மைத்த குறட்பாக்களுள்ளும் ஊடூடே 'அணுவிற்கு அணுவாய்' அமைந்த குறுமொழிகளைக் காணலாம் என்பதை எடுத்துக் காட்டவே இம்முயற்சி .

              படிப்போர் உள்ளத்தில் பளீரென ஊடுருவி நினைவில் உறைய வைப்பவை இக்குறுமொழிகளாகும். குறள்தரும் குறுமொழிகளைப் பயில்பவர் திருக்குறளை முற்றும் பயில ஊக்கம் பெறுவர் என்பது திண்ணம்.

            ஒரு குறட்பாவின் ஏழு சீர்களும் சேர்ந்த தொகுதி தரும் குறள்நெறி தவிர்த்து, அதனுள்ளும் ஒரு பகுதியாக மூன்று அல்லது நான்கு சீர்கள் மட்டுமே தனித்ததொரு கருத்துடனோ அல்லது அக்குறளின் மொத்தக் கருத்தின் சாயலாகவோ வருவதுண்டு. இதனையே “குறள்தரும் குறுமொழி” என ஈங்குக் குறிப்பிடுகிறேன்.

              ஒரே குறளில் இரு குறுமொழிகள் வருவதுண்டு; ஒரே குறுமொழி இரு குறள்களில் வருவதுமுண்டு. குறுமொழி தராக் குறள்களுமுண்டு.

            இன்று முதல் நாடோறும் ஒன்றென, குறள் தரும் குறுமொழிகளைப் பகிர விழைகிறேன்.

பயில்வோர்ப் பட்டுண்டு உலகம்

கல்வியை விற்றுக் கறைக்காசு குவித்த குபேரர்கள்

                                        கூட்டமாய் அடைபடட்டும்

கற்கையில் களம்புகுந்து அறப் போராடியோர்

                                   காலத்தே வெளிவரட்டும்

வித்தகம் உடையோர் விலைபோவாராயின்

                        கொட்டடியில் அடைபடட்டும்

சுத்தமனத்தோர் சுயத்தொடு வினைபுரிந்தோர்

                                வீதிதோறும் வெளிவரட்டும்

எத்தித் தின்போர் எதற்கும் துணிவோர் எளிதில்

                                             வாராது அடைபடட்டும்

நித்தியச் சோற்றிற்கு நிரந்தரம் இல்லாதோரெலாம்

                                                      நீதியுற வெளிவரட்டும்

கோடிகள் குவித்து கொட்டமடிப்போர் குறிவைத்தே

                                             கூண்டொடு அடைபடட்டும்

வாடிவதையுறுவோர் வளமொடு வாழ வழிகாட்டுவோர்

                    விரைந்து வெளிவரட்டும்

தவமென தாமே தனிவழி கண்டு மரபுரிமை முயல்வோர்

  முற்றாய் வெளிவரட்டும்

பனியில் உறைந்து வெயிலில் உலர்ந்த அறப்போராளர்

                                                              நலமே வெளிவரட்டும்

கள்ள நோக்குடன் கமுக்கச் சதிராடுவோர் கடையரென                                                        சடுதியில் அடைபடட்டும்

உள்ள சுத்தியொடு ஊருரிமைக்கு உழைக்கும் உத்தமர்

                                                              உடனே வெளிவரட்டும்

 படித்தவர் பொதுவெளி புகுதலும் பண்பாடே யென்போர்

                                                                 பரந்து வெளிவரட்டும்

அடுத்தவர் வெற்றி அபகரிக்கத் துடிக்கும் அரசியல் நரிகள்

                                                                  அன்றே அடைபடட்டும்

அறமொடு மறம் கரந்து அந்நியர் போற்றும் அறிவிலிகள்

                                                        அட்டியின்றி அடைபடட்டும்

தடியெடுத்தோர் எல்லாம் தண்டல்நாயகராய் எண்ணின்

தவறாதே அடைபடட்டும்

தடியடியே தனக்குவப்பாய்ப் பயிரைமேய்ந்த வேலிகளும்

                                            படிப்பினையாய் அடைபடட்டுமே!

   

கடிதம் எனும்  தூது

                                                           

கார்மேகம் வான வீதியில் ஊர்வலம் கண்டதும்

இடி முழக்கி மின்னல் வெட்டி மிரட்டியதுவும்

அம்மாவைக் கட்டியே அர்ச்சுனா என்றதுவும்

மழையெனும் மாயம் மறுபடியும் நிகழ்ந்ததுவும்

குளம் குட்டையெல்லாம் நிறைந்து தளும்பியதுவும்

குஞ்சு மீன்கள் ஆங்கே உயிர்த்து  விளையாடியதுவும்

கூட்டங் கூட்டமாய்க் கொக்குகள் குவிந்ததுவும்

குள்ளப் பசுவதுவும் கொட்டிலில் ஈன்றதுவும்

கொல்லையில் ரோசா பூத்துச் சிரித்ததுவும்

குலை தள்ளிய வாழையை வியந்து மகிழ்ந்ததுவும்

கோயில் கொடியேறி கொண்டாட்டம் துவங்கியதுவும்

ஒன்று விடாது உரைக்கும் மடலதுவாம்

நன்று நம்மிடைப் பழகிய மரபதுவாம்

இன்று கடிதக் கலையதுவும் கரைந்து மறைந்ததுவே

குறுஞ் செய்தி மின்னஞ்சல் குறுக்கினவோ

குழுக்கள் கூட்டும்  இணையந்தான்  விரட்டியதோ

விரைந்து செல்லும் இளையோர்காள் கேளீர் !

கலை நயமாம் மடல் பல வரைதல்

கடுகுச் செய்தியும் களிப்பை யூட்டும்

கற்பனை ஊறியே உள்ளம் உவக்கும்

கைவிடாதீர் கவின் தமிழில் கடிதம் வரைதல் !

                           

                             ( உலக கடிதம் எழுதும் தினம் – செப்டெம்பர் 1)

நெஞ்சு பொறுக்குதில்லையே -

கனலே நீயும் களங்கமுற்றாய்!

காமத்தில் வெந்தக் காமுகனைக்

கணத்தில் கருக்கினாய் சரியே!

கள்ளமிலாச் சிறுமியைச் சிதைத்தல் அறமோ?

களங்கமுற்றாய்த் தீயே நீயும் ஓர் ஆணாய்!

(30.7.16 அன்று  விழுப்புரத்தில் 32 வயது வெறியன் ஒருதலைக் காதல் கொண்டு 17 வயது சிறுமியைத் தீயிட்டுக் கொன்ற கொடுமை)

      

கழிப்பிடத்தும் கசடர் களிப்பு

காரிருள் போர்வையில் காமக்கயமை வெறியாட

கழிசடை இருவரும் காட்டுப் பன்றிகளாயினரே

ஒருவர் அழுக்கில் ஒருவர் கூடிடவும்

ஒப்பக் கூசாதோ வேசை உறுப்பிற்கும்

கழிப்பவளைக் களித்தீர் புதரிடை மாய்த்தீர்

கூறக்கூசிடும் கொடுமைதான் புரிந்தீர்

கொடும்பழி கொண்டீர் வாழுரிமை இழந்தீர்

அற்று விழட்டும் உம் ஆண் எனும் அடையாளம்

                (31.7.16 அன்று தஞ்சை ,சாலியமங்கலம் நிகழ்வு)

புதிய தலைமுறை தொலைக் காட்சியில் 15/7/2016  அன்று மாலை  4.30 மணிக்கு "கற்க கசடற"  நிகழ்ச்சியில் பங்கேற்றேன்.  தொலைநிலைக் கல்வி பற்றி நான் பேசியுள்ளதைக் காண இதைச் சொடுக்கவும் :

 நூல்கள் நம் உற்ற தோழர்கள். தமிழ் இலக்கிய  ஈர்ப்பினால் .   நான்              வாங்கி, படித்து முடித்த தமிழ் நூல்களைப் பட்டியலிட்டுள்ளேன்.                      அவற்றைக் காண விழையின் இதைச் சொடுக்கவும் :

பல  தலைப்புகளில் நான் எழுதியுள்ள கட்டுரைகளைப் படிக்க விரும்பினால்  இதைச் சொடுக்கவும் ; (கோப்பை  பதிவிறக்கம் செய்தபின் படித்தால் தெளிவாய்க் காணலாம்)

  

நான் படித்த நூல்களைப் பற்றிய எனது விமரிசனங்களைக் காண இதைச் சொடுக்கவும்.  (கோப்பை  பதிவிறக்கம் செய்தபின் படித்தால் தெளிவாய்க் காணலாம்)

யாருக்கு மதிப்பு

மரித்ததும் –

மனிதவுடல் மயானத்துச் சாம்பல்

விலங்கோ 
காட்சியாகும் கலைப்பொருளாம்

கூறிடுவீர் , யாருக்கு மதிப்பு?

மனிதரா, மாக்களா?

              யாரிடம் போராட?

நிலப்பரப்பில் எங்கோவொரு நீர்ப்பரப்பு இங்கேயாம்

நீர்ப்பரப்பில் ஆங்காங்கே நிலப்பரப்பு அங்கேயாம்

இயற்கைக் கொடையில் இத்தனை அநீதியா? 

சமநீதி கோரி யாரிடம் போராட?

சூல்கொண்ட மேகங்களே

மறித்து நிற்கும் மலையைத் தாண்டி

மறுபுறமும் பொழிவாய் மழையை

நிலத்தில் நீதி நாட்டிடுவாய்

            (அண்மையில் கேரளம் சுற்றிவந்தபின் மனதில் தோன்றியது)