Pages

Tuesday, 20 February 2018

முச்சந்தி முரசு


நாட்டுக்குள் சிக்கியதோ காவலாளி
நட்புக்கு இலக்கணமாம் விருந்தாளி

புதரின் மறைபொருள்:
1.     நரிகள் - தந்திரம் நிறைந்த சமூக விரோதிகள்
2.     நாடு     -  சட்டப் பரிபாலனத்திற்கு உட்பட்ட சமூக வெளி
3.     காவலாளி – சட்டம், ஒழுங்கை காக்கும் மக்களின் நண்பர்
4.     விருந்தாளி – திருடன் வீட்டு விருந்தில் விரும்பி உண்டு, ஊட்டி,                                    உறவாடுபவர்


Friday, 16 February 2018


முச்சந்தி முரசு

புற்றுதோறும் பாம்பு
புலம்புவதோ எறும்பு
புகாரில் சிக்குவது பிடாரன் கம்பு!

புதிர் சாவி:
1. புற்று  – பல்லோர் சேமிப்பை, வணிக வாய்க்காலில் பாய்ச்சி வளம்                           பெருக்கும் வங்கி எனும் கட்டமைப்பு
2. எறும்பு – சிறுகச் சிறுக பன்னாளில் சேமித்து பாதுகாப்பிற்கென வங்கியில்           வைக்கும் வாடிக்கையாளர்
3. பாம்பு – பலத்தைக் காட்டிப் புற்றை ஆக்கிரமித்து கபளீகரம் செய்யும்                              பெருங்கடன்தாரர்கள்
4. பிடாரன் – கண்ணிமையாது கண்காணிக்க உருவான நெறிமுறைகள்

5. கம்பு    -  தூங்கியே கோட்டைவிடும் துப்புக்கெட்ட தணிக்கை

Wednesday, 14 February 2018





காதல் செய்வீர் மானிடரே!

கனவிலும் மறவாக் காதலியை
கண்ணினும் மேலாம் கண்ணாட்டியை
கடிந்தும் அன்பூறும் பிள்ளைகளை
கடைவரை குற்றம் பொறுக்கும் பெற்றோரை
கரவாது உறவாடும் உடன்பிறப்புகளை
கலந்து மகிழ்ந்திடும் நல் உற்றாரை
கலங்கும்காலை கைகொடுக்கும் நட்டாரை
கணமும் துறக்கவொண்ணாத் தாய்நாட்டை
கற்கச் சிறந்த நம் தாய்மொழியை
கடனெனக் காப்பதே களிப்பேருவகை
ஆதலினால் ,
காதல் செய்வீர் மானிடரே!
கடுஞ்சினம் துறந்து கடும்பகை மறந்து
கடலெனக் காதல் கொள்வீர் ஆருயிர்மீதெலாம்!                                                                                                                                                                                                                                                                                                  (காதலர் தினம் – பிப்ரவரி 14)

Saturday, 10 February 2018

முச்சந்தி முரசு




அகந்தையின் அத்துமீறல்

அனைவரும் தூற்றுவரே
அர்ச்சகர் கைவண்ணம்
அம்மனும் அழகாமோ சுடிதாரில்





அதிவிரைவு ஆபத்து

விழைந்தால் சேர்வு
வெறுத்தால் முறிவு
நொடியில் தீர்வு


நாட்டுப் புறத்துப் பஞ்சாயத்து
நாட்டாமை மீதின்று பிராது
நானாவித சொம்புகள் சிலும்பின காண்!

சிறிய சொம்புகள் சேர்ந்தன
பெரிய  சொம்பைச் சாடின
சோபிதம் இழந்து சொப்புகள் ஆயின




கூண்டில் சுகிப்பது தாய்க்கிளியாம்
குளிர் விட்டுளறுது தந்தைக் கிளியாம்
குட்டிக் கரணம் அடிப்பதோ இளங்கிளிகளாம்



பொம்மலாட்டம் :

இரண்டு பொம்மைகள் ஆடுதாம்
இடையிடையே அவை விலகுதாம்
இருட்டில் சமரசம் கிட்டுதாம்
மாயக் கயிறு ஆட்டுதாம்




 சகல கலா வரி:

அப்பா தந்தார் அப்படியே சம்பளத்தை
அம்மா போட்டாள் அம்மாதக் கணக்கை
அரசு புகுந்து அள்ளிச் செல்லுதே




2018 சந்திரக் கிரகணம்   
( 152 ஆண்டுகளுக்குப் பிறகு அரிய நிகழ்வு)

சாய்கதிர் முத்தாடி சிவந்தனையோ
சந்தியில் மயங்கி நீலம் பாரித்தனையோ
சடுதியில் மறைந்து சல்லாபித்தனையோ
சாந்தியில் பூரித்துப் பருத்தனையோ




பக்தியும் பழிப்பும்

ஆண்டாளைப் பழித்தால்
அடியவர்க்கு கோபம்
ஆத்திரத்தில் பறக்குதே புட்டிகள்

பாவம் ஆண்டாள்
பழித்தவரை விஞ்சியதே
பக்தர்கள் பழிப்பு!

Wednesday, 19 July 2017





சிறுமைகளுக்கு நாணாதார் சமுதாயத்தின் புற்று எனலாம். இதைப்பற்றிய எனது கட்டுரை ஒன்றினைப் படிக்க இதைச் சொடுக்கவும் ; பதிவிறக்கம் செய்து படிக்கவும்.  கட்டுரைப்பற்றிய   தங்கள் கருத்துக்களை அங்கேயே பதிவிடலாம்.

Tuesday, 11 July 2017



 கிடைத்தற்கரிய பொன்மொழிகள்  தமிழில் பரவிக்கிடக்கின்றன. அவற்றில்  சிலவற்றைப் பார்க்க விழைகிறீர்களா? இதைச் சொடுக்குங்கள் ;   (கோப்பை  பதிவிறக்கம் செய்தபின் படித்தால் தெளிவாய்க் காணலாம்)

Thursday, 4 May 2017




எனது இற்றைநாள் கவிதைகளைப் படித்து மகிழ இதைச் சொடுக்கவும் :  (கோப்பை  பதிவிறக்கம் செய்தபின் படித்தால் தெளிவாய்க் காணலாம்) 

Friday, 3 March 2017







“The greatest textbook for leadership is facing crisis.” - Ratan Tata



நெருக்கடிகளை எதிர்கொள்வதுதான் தலைமைக்கானப் பாடப்புத்தகம்ரட்டன் டாடா

Wednesday, 22 February 2017




அச்சம் உடையார்க்கு அரண் இல்லை   


 (குறள்: 534  -அதிகாரம்:  பொச்சாவாமை)

Tuesday, 21 February 2017



அகந்தூய்மை வாய்மையால் காணப்படும்                                                                            (குறள்: 298 – வாய்மை)


குறள்தரும் குறுமொழி
            தமிழில் முதல் அடியில் நான்கு சீர்களும், இரண்டாம் அடியில் மூன்று சீர்களும் கொண்ட குறள் வெண்பாதான் மிகச் சுருங்கிய வடிவில் அமைந்த பாடல் வகையாகும் (நூற்பா எனும் சூத்திர யாப்புக்கு அடுத்ததாக என்பர்). "அணுவைத் துளைத்தேழ் கடலைப் புகட்டிக் குறுகத் தறித்த குறள்எனும் ஒளவை வாக்கிலிருந்து வள்ளுவரின் சொற்சிக்கனத்தையும், பொருட் செறிவையும் எளிதேயுணரலாம். இத்தன்மைத்த குறட்பாக்களுள்ளும் ஊடூடே 'அணுவிற்கு அணுவாய்' அமைந்த குறுமொழிகளைக் காணலாம் என்பதை எடுத்துக் காட்டவே இம்முயற்சி .
              படிப்போர் உள்ளத்தில் பளீரென ஊடுருவி நினைவில் உறைய வைப்பவை இக்குறுமொழிகளாகும். குறள்தரும் குறுமொழிகளைப் பயில்பவர் திருக்குறளை முற்றும் பயில ஊக்கம் பெறுவர் என்பது திண்ணம்.
            ஒரு குறட்பாவின் ஏழு சீர்களும் சேர்ந்த தொகுதி தரும் குறள்நெறி தவிர்த்து, அதனுள்ளும் ஒரு பகுதியாக மூன்று அல்லது நான்கு சீர்கள் மட்டுமே தனித்ததொரு கருத்துடனோ அல்லது அக்குறளின் மொத்தக் கருத்தின் சாயலாகவோ வருவதுண்டு. இதனையேகுறள்தரும் குறுமொழிஎன ஈங்குக் குறிப்பிடுகிறேன்.
              ஒரே குறளில் இரு குறுமொழிகள் வருவதுண்டு; ஒரே குறுமொழி இரு குறள்களில் வருவதுமுண்டு. குறுமொழி தராக் குறள்களுமுண்டு.

            இன்று முதல் நாடோறும் ஒன்றென, குறள் தரும் குறுமொழிகளைப் பகிர விழைகிறேன்.

Tuesday, 31 January 2017



பயில்வோர்ப் பட்டுண்டு உலகம்

கல்வியை விற்றுக் கறைக்காசு குவித்த குபேரர்கள்
                                        கூட்டமாய் அடைபடட்டும்
கற்கையில் களம்புகுந்து அறப் போராடியோர்
                                   காலத்தே வெளிவரட்டும்
வித்தகம் உடையோர் விலைபோவாராயின்
                        கொட்டடியில் அடைபடட்டும்
சுத்தமனத்தோர் சுயத்தொடு வினைபுரிந்தோர்
                                வீதிதோறும் வெளிவரட்டும்
எத்தித் தின்போர் எதற்கும் துணிவோர் எளிதில்
                                             வாராது அடைபடட்டும்
நித்தியச் சோற்றிற்கு நிரந்தரம் இல்லாதோரெலாம்
                                                      நீதியுற வெளிவரட்டும்
கோடிகள் குவித்து கொட்டமடிப்போர் குறிவைத்தே
                                             கூண்டொடு அடைபடட்டும்
வாடிவதையுறுவோர் வளமொடு வாழ வழிகாட்டுவோர்
                    விரைந்து வெளிவரட்டும்
தவமென தாமே தனிவழி கண்டு மரபுரிமை முயல்வோர்
  முற்றாய் வெளிவரட்டும்
பனியில் உறைந்து வெயிலில் உலர்ந்த அறப்போராளர்
                                                              நலமே வெளிவரட்டும்
கள்ள நோக்குடன் கமுக்கச் சதிராடுவோர் கடையரென                                                        சடுதியில் அடைபடட்டும்
உள்ள சுத்தியொடு ஊருரிமைக்கு உழைக்கும் உத்தமர்
                                                              உடனே வெளிவரட்டும்
 படித்தவர் பொதுவெளி புகுதலும் பண்பாடே யென்போர்
                                                                 பரந்து வெளிவரட்டும்
அடுத்தவர் வெற்றி அபகரிக்கத் துடிக்கும் அரசியல் நரிகள்
                                                                  அன்றே அடைபடட்டும்
அறமொடு மறம் கரந்து அந்நியர் போற்றும் அறிவிலிகள்
                                                        அட்டியின்றி அடைபடட்டும்
தடியெடுத்தோர் எல்லாம் தண்டல்நாயகராய் எண்ணின்
தவறாதே அடைபடட்டும்
தடியடியே தனக்குவப்பாய்ப் பயிரைமேய்ந்த வேலிகளும்
                                            படிப்பினையாய் அடைபடட்டுமே!

   

Thursday, 1 September 2016




கடிதம் எனும்  தூது
                                                           
கார்மேகம் வான வீதியில் ஊர்வலம் கண்டதும்
இடி முழக்கி மின்னல் வெட்டி மிரட்டியதுவும்
அம்மாவைக் கட்டியே அர்ச்சுனா என்றதுவும்
மழையெனும் மாயம் மறுபடியும் நிகழ்ந்ததுவும்
குளம் குட்டையெல்லாம் நிறைந்து தளும்பியதுவும்
குஞ்சு மீன்கள் ஆங்கே உயிர்த்து  விளையாடியதுவும்
கூட்டங் கூட்டமாய்க் கொக்குகள் குவிந்ததுவும்
குள்ளப் பசுவதுவும் கொட்டிலில் ஈன்றதுவும்
கொல்லையில் ரோசா பூத்துச் சிரித்ததுவும்
குலை தள்ளிய வாழையை வியந்து மகிழ்ந்ததுவும்
கோயில் கொடியேறி கொண்டாட்டம் துவங்கியதுவும்
ஒன்று விடாது உரைக்கும் மடலதுவாம்
நன்று நம்மிடைப் பழகிய மரபதுவாம்
இன்று கடிதக் கலையதுவும் கரைந்து மறைந்ததுவே
குறுஞ் செய்தி மின்னஞ்சல் குறுக்கினவோ
குழுக்கள் கூட்டும்  இணையந்தான்  விரட்டியதோ
விரைந்து செல்லும் இளையோர்காள் கேளீர் !
கலை நயமாம் மடல் பல வரைதல்
கடுகுச் செய்தியும் களிப்பை யூட்டும்
கற்பனை ஊறியே உள்ளம் உவக்கும்
கைவிடாதீர் கவின் தமிழில் கடிதம் வரைதல் !
                           
                             ( உலக கடிதம் எழுதும் தினம் – செப்டெம்பர் 1)










Tuesday, 9 August 2016



நெஞ்சு பொறுக்குதில்லையே -
கனலே நீயும் களங்கமுற்றாய்!

காமத்தில் வெந்தக் காமுகனைக்
கணத்தில் கருக்கினாய் சரியே!
கள்ளமிலாச் சிறுமியைச் சிதைத்தல் அறமோ?
களங்கமுற்றாய்த் தீயே நீயும் ஓர் ஆணாய்!
(30.7.16 அன்று  விழுப்புரத்தில் 32 வயது வெறியன் ஒருதலைக் காதல் கொண்டு 17 வயது சிறுமியைத் தீயிட்டுக் கொன்ற கொடுமை)

      
கழிப்பிடத்தும் கசடர் களிப்பு

காரிருள் போர்வையில் காமக்கயமை வெறியாட
கழிசடை இருவரும் காட்டுப் பன்றிகளாயினரே
ஒருவர் அழுக்கில் ஒருவர் கூடிடவும்
ஒப்பக் கூசாதோ வேசை உறுப்பிற்கும்

கழிப்பவளைக் களித்தீர் புதரிடை மாய்த்தீர்
கூறக்கூசிடும் கொடுமைதான் புரிந்தீர்
கொடும்பழி கொண்டீர் வாழுரிமை இழந்தீர்
அற்று விழட்டும் உம் ஆண் எனும் அடையாளம்


                (31.7.16 அன்று தஞ்சை ,சாலியமங்கலம் நிகழ்வு)

Saturday, 16 July 2016










புதிய தலைமுறை தொலைக் காட்சியில் 15/7/2016  அன்று மாலை  4.30 மணிக்கு "கற்க கசடற"  நிகழ்ச்சியில் பங்கேற்றேன்.  தொலைநிலைக் கல்வி பற்றி நான் பேசியுள்ளதைக் காண இதைச் சொடுக்கவும் :